MORONDIYOHOME BLOG

HATIMA ya  Katibu    wa taasisi na Jumuiya za Kiislam Tanzania Shekhe Ponda Issa Ponda   kupewa dhamana au kunyimwa  itajulikana Septemba 17  mwaka huu katika mahakama ya hakimu mkazi mkoa wa Morogoro baada ya hakimu wa mahakama hiyo Richard Kabate kushindwa kutoa kutoa dhamana hiyo jana kwa mdaia kuwa suala hilo lipo kisheria zaidi na hivyo apewe muda kulifanyia maamuzi.

 

Hakimu mkazi Mfawidhi mkoa wa Morogoro Richard Kabate alitoa kauli hiyo mahakamani hapo baada ya mwanasheria mkuu wa serikali  Bernard Kongola   kuwasilisha hati ya kupinga dhamana  ya mshitakiwa  huyo  iliotolewa na mkurugenzi wa mashitaka DPP.

 

Hatua hiyo ilikuja baada ya wakili wa upande wa utetezi  unaoongozwa na wakili Juma Nasoro pamoja na  Ignas Punge na Bartlomelo Tarimo

Kuwasilisha maombi mawili la kuomba mshitakiwa kupewa dhamana kutokana na kesi inayomkabili kuwa na dhmana, sambamba na kuomba kupata maelezo ya mlalamikaji ili upande wa utetezi kuweza kuanza utetezi ombi ambalo mwansheria mkuu wa serikali alisema kuwa wamelikubali.

 

Hata hivyo baada ya mwanasheria  mkuu wa serikali kutoa hati hiyo upande wa utetezi    ulipinga hati hiyo kwa madai kuwa haikufuta taratibu za kisheria ikiwa ni pamoja na kutoingizwa  katika file la mahakama sambamba na kutoonyesha   sahihi ya upande wa utetezi.

   

Wakili huyo upande wa utetezi alidai kuwa kifungu cha 148 (4) cha mwenendo wa makosa ya jinai kilichotumika katika fomu hiyo kupinga dhamana kinaanza kutumika pele tu hati hiyo inapowekwa katika mafaili ya mahakama jambo ambalo alisema bado halijafanyika.

 

Awali mwanasheria mkuu wa serikali huyo   mbele ya hakimu mkazi Mfawidhi mkoa wa Morogoro  Kabate ,alidai mahakamani hapo kuwa  mnamo Agosti 10 mwaka huu katika eneo la Kiwanja cha Ndege  manispaa ya Morogoro Ponda Issa Ponda aliwaambia “ndugu waislamu msikubali uundwaji wa kamati za ulinzi na usalama za misikiti kwani kamati hizo zimeundwa na Bwakwata ambao ni vibaraka wa CCM na serikali na kama  watajitokeza kwenu watu hao na watajitambulisha kwamba wao ni kamati za ulinzi  na usalama za misikiti,fungeni milango na madirisha ya msikiti yenu na muwapige sana” na kwamba kauli ambayo ilikuwa ikiumiza imani za watu wengine,na kwamba hatua hiyo ni kinyume cha agizo la mahakama  ya hakimu mkazi Kisutu  Dar-es-salaam iliyotolewa na hakimu V. Nongwa  tarehe mei 9 mwaka huu ambayo ilimtaka ndani ya mwaka mzima kuhubiri amani, ambayo ni kinyume na kifungu cha sheria namba 124 cha mwaka 2002, shitaka ambalo alikana.

 

Katika shitaka la Pili lililosomwa na mwanasheria mkuu wa serikali Bernard Kongola alisema Agosti 10 mwaka huu katika eneo la Kiwanja cha Ndege manispaa ya Morogoro na mkoa wa Morogoro waliwaambia waislam serikali ilipeleka jeshi Mtwara kushughulikia suala vurugu iliyotokana  na gesi kwa kuwaua,kuwabaka, na kuwatesa wananchi kwa sababu asilimia 90 ya wakazi wake ni waislamu lakini serikali haikufanya hivyo kwa wananchi wa Loliondo walipokataa ,mwarabu asipatiwe kipande cha ardhi ya uwindaji baada ya kudai ni mali yao kwa sababu asilimia 90 ya wakazi wake ni wakristu  na kusema kuwa  maneno ambayo yaliumiza imani za watu wengine  ambalo ni kinyume cha kifungu cha sheria 129 cha mwaka 2002shitaka ambalo pia mashtakiwa  Ponda Isa Ponda  alikana.

 

Aidha katika shitaka la tatu ilidaiwa mahakamani hapo na mwanasheria mkuu wa serikali  Bernard Kongola kuwa mnamo Agosto 10 mwaka huu eneo la kiwanja cha ndege manispaa na mkoa wa Morogoro mashitakiwa aliwashawishi waislamu kuwa serikali ilipeleka jeshi Mtwara kushughulikia suala la vurugu uliyotokana na gesi kwa kuwaua,kuwabaka na kuwatesa wananchi kwa sababu asilimia 90 ya wakazi wake ni waislamu lakini serikali haifanya hivyo kwa wananchi wa Liliondo walipotaka Mwarabu asipatiwe kipande cha ardhi  ya uwindaji baada ya kudai ni mali yao  kwa sababu asilimia 90 ya wakazi wake ni wakristo” na mwanasheria kusema kuwa  maneno ambayo yalikuwa yakiumiza imani za watu  wengine na kwamba kufanya hivyo ni kinyume cha kifungu cha sheria  namba  390 na kanuni ya adhabu namba 35 cha mwaka 2002,  

 

Hata hivyo Sheikh Ponda  alikana mashitaka hayo na kukiri kuwepo eneo la tukio  tarehe ya tukio ambayo ni Agosti 10, kukamatwa kwake pamoja na jina lake lililotumika mahakamani hapo.

 

Kesi hiyo imepangwa kutajwa tena Septemba 11 mwaka huu, ambapo Septemba 17 ndipo yatatolewa maamuzi ya kupata dhamana au laa huku wakili wa serikali adai kuwa upande wa mashitaka umeandaa mashahidi 15  watakaotoa ushahidi dhidi ya Ponda, DVD 2, kibali cha kongamano kilichotolewa na polisi pamoja na nakala ya hukumu iliotolewa katika kesi ya jinai ya   Sheikh Ponda  iliotolewa  na hakimu mkazi  wa mahakama ya Kisutu Nongwa katika mahakama ya Kisutu.

 

 Katika hali isiyo ya kawaida mshitakiwa huyo alipofikishwa mahakamani alitumia njia ya usafiri wa basi la magereza tofauti na watu walivyotarajia kwa helkopta kama ilivyokuwa awali.

 

Maelfu  ya wafuasi wa Sheikh Ponda walifika katika eneo la mahakama hiyo na kuanza kupiga kelele wakati mshitakiwa huyo akiingia mahakamani  na hata badae kuzingira magari ya polisi  na askari magereza waliokuwa wakimsindikiza mshitakiwa huyo.

 

 Pamoja na kuwepo kwa makundi makubwa ya watu hao wakiwemo wanawake waliovalia ninja, polisi kwa kushitikiana na askari wa magereza waliimarisha ulizni mahakamani hapo sambamba na kuweka uzio wa kamba  kutpruhusu wafuasi hao kusogea eneo la mahakama.