JUMUIYA YA WAISLAM MORO YAKATAA KAMATI YA KUCHUNGUZWA KUPIGWA RISASI SHEIKH PONDA

UONGOZI wa  Jumuiya na Taasisi za kislamu mkoa wa Morogoro,umeikataa kamati ya haki jinai iliyoundwa na Jeshi la polisi nchini kwajili ya kuchunguza tukio linalodaiwa  kupigwa risasi kwa Mwenyekiti wa jumuiya na taasisi hiyo nchini Sheikh Issa Ponda.

 

Mwenyekiti wa jumuiya na taasisi hiyo mkoa wa

Morogoro Sheikh Ayubu mwinge salumu alisema hayo baada ya kuitwa na tume hiyo katika ofisi ya kamanda wa polisi mkoa wa morogoro ambako tume iliweka kambi kwajili ya kuhoji na kusikiliza ushahidi wa tukio hilo kwa waumini wa dini hiyo ambao walikuwepo katika tukio hilo.

Akizungumza na Waandishi wa habari mara baada ya kugoma kutoa ushahidi kwa kamati hiyo,Sheikh Salum alisema kuwa hawapo tayari kutoa ushahidi huo kwakuwa hawana imani na kamati hiyo kwakuwa kamati hiyo haipo huru kama walivyotarajia.

Alisema kuwa wao ndio waliomba kuundwa kwa tume hiyo na kutaka iwe huru lakini wameshangazwa tume hiyo kuundwa na jeshi hilo la polisi ambalo ndio linalolalamikiwa  kutokana na tukio hilo.

Mwenyekiti huyo alisema kuwa wao wanaushahidi wa kutosha kuhusiana na tukio hilo lilotokea Agosti 10 mwaka huu mara baada ya Sheikh Ponda kumaliza kuhutubia kongamano la waadhiri lilofanyika katika uwanja wa shule ya msingi kiwanja cha ndege.

Alisema kuwa watakuwa tayari kutoa ushahidi katika kamati hiyo wajumbe wake watapatikana nje ya Serikali na wengine nje ya nchi.

Hata hivyo mwenyekiti huyo alisema kuwa kamati hiyo inayoundwa na kamishna wa jeshi hilo Isaya Mngullu imekubali maombi yao na kuyapeleka makao makuu ya jeshi hilo.

Alisema kuwa hivi sasa wanawasilina na uongozi wa taifa wa Jumuiya na Taasisi za kislamu Taifa ili kujua ni viongozi gani wataongezewa katika kutoa ushahidi katika kamati itakayokuwa huru kushunguza tukio la Sheikh Ponda.

Naye naibu mwenyekiti wa Jumuiya na Taasisi za kislamu mkoa wa Morogoro,Sheikh Chaulembo Ally,alisema kuwa polisi ndio wamekuwa chanzo cha matukio ya waislam kufanyiwa vurugu katika makongamano yao.

Alikumbushia tukio la muumini wao Hamis Dibagula lilotokea mwaka 2001 ambapo walimkamata na kuhukumiwa mashtaka na kufungwa miezi 18 kwa madai kuwa alifanya uchochezi.