wizara kilimo, chakula na ushirika yalenga kuendeleza skimu za umwagiliaji

Wizara ya kilimo chakula na ushirika imelenga kuendeleza skimu za umwagiliaji 78 Tanzania ili kutekeleza mfumo wa Tekeleza sasa kwa matokeo makubwa (BRN) ikiwa ni muendelezo wa kuboresha mpango wa kilimo kwanza hapa nchini.

Akizungumza kwenye mafunzo kuhusu mfumo wa matokeo makubwa sasa (BRN) kwa watendaji wa sekta ya kilimo Mhandisi wa umwagiliaji kutoka ofisi ya mkuu wa mkoa wa Morogoro Evodius Lulazi alisema, mfumo huo umeweza kuingiza skimu 23 za umwagiliaji kutoka katika wilaya 4 za mkoa wa Morogoro.

 

Alizitaja wilaya hizo kuwa ni pamoja na Kilombero 9, Kilosa 7, Morogoro vijijini 4 na Mvomero 3 na kwamba wilaya hizo ikiwemo wilaya ya Ulanga zitatumika kama wilaya za mfano za utekelezaji wa mfumo huo kimkoa ambazo pia zitawanufaisha wakulima wa maeneo husika na maeneo jirani.

Alisema, kufuatia Serikali kutenga mazao matatu yakiwemo mahindi, mpunga na miwa katika kutekeleza mfumo huo wanatarajia kufungua hekari 25 za uwekezaji wa mashamba ya miwa wilayani Morogoro ili kufanya uzalishaji wa sukari kuwa mkubwa hapa nchini na kuongeza pato na kukuza uchumi wa Taifa.

Akifungua Mafunzo hayo Katibu Tawala Msaidizi (Uchumi) Lameck Loah alisema, chimbuko la mfumo huo limekuja baada ya  Serikali kuchukua maamuzi ya kupitia Dira ya Taifa ya Maendeleo ya mwaka 2025 na kubaini uwepo wa kasi ndogo ya utekelezaji wa miradi, programu na mikakati ya maendeleo na kusababisha Serikali kurejesha utaratibu wa maendeleo ya muda wa kati yaani miaka mitano.

Alisema, mahitaji ya Dira yalionyesha kuwa kuna hitaji la kuongeza kasi ya utekelezaji wa mipango ya maendeleo na kuamua kuasili mfumo unaotumika nchi za Malaysia , Indonesia na Korea Kusini wenye lengo la kuchagua na kutekeleza vipaumbele vichache vyenye kuleta matokeo makubwa naya haraka.

Aidha Noah alisema kuwa pia mfumo huo una nidhamu ya hali ya juu katika utekelezaji na kuwa na vigezo bayana vya kupima kiwango cha mafanikio katika utekelezaji ili kuimarisha uwajibikaji wa viongozi na watekelezaji.

Tayari wakurugenzi wa Halmashauri zote nchini na washauri wa kilimo katika mikoa wameshapatiwa mafunzo ya namna ya kukabiliana na mfumo huo ili kupiga hatua katika malengo ya kilimo kwanza ndani ya mfumo huo wa (Big Result Now, (BRN) ambao utekelezaji wake kimfumo unaisha mwaka 2015.