KATIBU MKUU WIZARA YA MAMBO YA NDANI ANENA

KATIBU Mkuu wizara ya mambo ya ndani ya nchi Mbarak Abdulwakil amesema, uhusiano kati ya TUGHE na mwajiri usipofahamika vyema kwa pande zote mbili unaweza kuchukuliwa kama uhusiano wa mashaka au wa kutoaminiana wakati haipaswi kuwa hivyo.

Abdulwakil aliyasema hayo jana wakati akizindua Baraza dogo la wafanyakazi Idara ya Uhamiaji lililofanyika mjini hapa ambapo alisema kuwa ili kujenga uhusiano mzuri baina yao na TUGHE inapaswa viongozi wa idara kujitoa kuongea na uongozi huo mara unapofika kwa ajili ya mazungumza ili kuweza kuleta usawa na usahihi katika masuala ya kazi.

Alisema kuwa wakati uongozi wa TUGHE ukiendelea kutetea maslahi ya wafanyakazi lakini pia utakuwa mstari wa mbele katika kujenga na kusimamia nidhamu na uwajibikaji wa watumishi katika kazi ili kuongeza ufanisi na tija kwenye kazi husika.

Katibu mkuu huyo alisema, ifahamike kwamba haki inatakiwa kwenda sanjari na wajibu na kwamba kama mfanyakazi atatekeleza wajibu wake ipasavyo anaamini hata haki yake ataipata kwa wakati tofauti na mfanyakazi ambaye hawajibiki ipasavyo, mtoro, mlevi, mtovu wa nidhamu ambaye hata TUGHE haitaweza kumtetea mfanyakazi wa aina hiyo.

Hivyo alisema kuwepo kwa mipango inayozingatia mahitaji na uwezo wa Idara bila malumbano, bali kwa staha, ustahimilivu, weledi na kwa kuzingatia sheria na kanuni zinazotawala mabaraza ya wafanyakazi mahala pa kazi sambamba na viongozi na wajumbe wa baraza hilo kufahamu na kutumia sheria, kanuni na taratibu zinazotawala vikao vya baraza katika kutekeleza majukumu yao .

Naye Kamishna mkuu wa Idara ya uhamiaji Magnus Ulungi alisema, sheria za kazi na mikataba mahala pa kazi zinaelekeza kuwa mahali ambapo kuna watumishi wanaofikia kumi na kuendelea pawepo na Chama Cha wafanyakazi na mabaraza ya wafanyakazi kwa lengo la kusimamia maslahi ya wafanyakazi pamoja na mustakabali mzima wa maendeleo ya Taasisi husika.